فُوس فات

إيهْ يعني مصلوبْ بالطول
أو يعني مسحولْ بالعرض
حَدّ يقول لي إيه الفرق؟!
...
بِالله قُلْ لي إيه الفرق ..
"فوس فات"بقا والّا ـ "فوس فور"؟!
يعني لو قتلوك عَ الأرض
والّا رمُوكْ من سابع دُور!!
...

قالوا علينا في الحكايات

لمّا الكارثة حَلِّت بينا
والتعلب بقا حاكم فينا
و لمّا النيل بقا آخر نيلة
وبقى مستودع للنفايات

كان لازم نشرب فوسفات !!
...

لمّا جُعنا أكلنا زبالة
ولمّا عرِيْنا لبسنا "البالة"
وضَيَّعنا "المقوار و الفالة"
وحتى أبونا السقا مات

نشربْ إيه بَقا غِيرْ فوسفات؟!
...

فاكر لمّا كنا صغارْ
كانوا يقولوا علينا شُطار
وِ احنا بتِلعبْ فينا الدار
بسّ العُمْر آهو عدَّا و فات

وصارْ فينا نشربْ فوسفات!!
...

قالوا علينا كتيرْ حكايات
في تويتر و عمومْ الشات
"فوس فور" بقا والّا ـ "فوس فات"

في الحالتين آهُو شعبْ و مات !!